اهم 10 أسئلة في الانترفيو
اهم 10 أسئلة في الانترفيو
اهم 10 أسئلة في الانترفيو واكثرها شيوعا وازاى تقدر تجاوب عليها
خلي بالك انى هقولك ازاى تجاوب ع الاسئلة مش الاجابه نفسها ( اوعى تحفظ اجابة من حد )
1- عرف نفسك؟
اول حاجه عاوزك تعملها انك تجاوب بنفس لغة السؤال ،،يعنى لو سألك بالعربي جاوب بالعربي ..سألك E يبقي تجاوب E ..بلاش تسأل أجاوب عربي ولا E ..
تانى حاجة اما تيجى تجاوب بلاش تقول التفاصيل الشخصيه زى عندى كام اخ واخت وبابا متجوز اتنين وانا من ام تانيه والرغي ده
تالت حاجه ركز ع الانجازات بتاعتك او المشاريع اللي انت اشتغلت فيها بمعنى عاوزك تقول اللي محتاج شرح ومش متوضح ف ال CV
ولو انت حديث التخرج اتكلم ع الانشطة الطلابية اللي اشتركت فيها
2- ليه عاوز تسيب شركتك ؟
اول حاجه بلاش يبقي الكلام كله توضيح للمساوئ اللي انت شايفها في شركتك لانك ببساطة ممكن تقول سلبيات هى اصلا موجوده في الشركة اللي انتى مقدم فيها
تانى حاجه عاوزك تجمع معلومات عن الشركة الجديده عشان تبدء توضحها وتقول ان الحاجات دى كانت سبب كبير انك تقدم عندهم
ثالث حاجه انك هتوضح عادى انك بتعمل upgrade لنفسك في كل حاجه فى position and salary
3- عاوز تكون فين بعد ...سنه ؟
السؤال ده بالرغم ان كلنا بنتريق عليه الا ما زلنا بنتسأل عليه فلازم نعرف ممكن نجاوبه ازاى ..
السؤال ده بيشوف طموحك هل هو مبنى ع خطة موضوعه صح ولا طموح مش مدروس ولا معندكش طموح اصلا .. يعنى مثلا انت عاوز تكون صاحب شركة او مدير ادارة او مدير عام ..ايا كان فلازم تكون خطتك مبنيه ع قاعده Smart.. اقرأ القاعده دي كويس عشان تعرف تبنى طموحك عليها
4- نقاط القوة والضعف ؟
هو عاوز يسمع منك انت مميز في ايه ومختلف عن غيرك في ايه.. اهم حاجه انك هتوضح نقاط قوتك اللي تفيد الوظيفة ..يعنى لو مقدم ع موظف أمن هنا ممكن تقول ان صحتك قويه و رياضي ومش مدخن ..لكن لو هتقدم ع محاسب اكيد مش هيمنى كشركة الحاجات دى كلها .. لكن ممكن تقوله مثلا انك محترف ف الاكسل وبتتعلم بسرعة وهكذا
اما تيجى تجاوب ف العيوب .. بلاش تقول العيوب اللي هي هتضر الشغل والشركة من غير كذب طبعا .. وممكن تقول ع عيوب حلتها واشتغلت فيها ع نفسك
5- ليه اختارك انت مش حد تانى ؟
6-لو انت مكانى تختار الشخص المناسب ازاى ؟
السؤالين دول بنفس المعنى... اما تيجى تجاوب حاول تعمل توافق ما بين متطلبات الوظيفه والشركة وما بين مهاراتك وخبراتك وامكانياتك
فلازم تكون عارف كويس احتياجات الوظيفه عشان تقدر تقول انك هتعرف تعمل كذا وكذا
7- ليه عاوز تشتغل في المجال ده ؟
مهم اوى وانت بتجاوب تقول انك قريت او ذاكرت المجال ده ولاقيت ان مهاراتك وامكانياتك هتساعدك على لنجاح ف المجال ده
بلاش بقى تقول انك بتحبه وتحسس الراجل ان المجال دى خطيبتك وبلاش كلمه سمعت عن المجال او حد قالك مش عارف ايه دا مش مظبوط.
8- تعرف ايه عن شركتنا ؟
لازم تكون ملم بالمنتجات او الخدمات اللي بتقدمها الشركة ..اعرف الدول او المحافظات اللي فيها فروع .. اعرف عدد الفروع .. وكل ده من موقع الشركة
9- ايه اكبر انجاز حققته ؟
مهم اوى تكون مجهز اجابة السؤال ده .. ممكن يكون مشروع التخرج لو انت خريج جديد ...ممكن يكون نجاحك بتفوق ف دراستك ..حاول يكون الانجاز ف الحياة العمليه مش الشخصيه
10- المرتب المتوقع كام؟
اول حاجه ..مش هينفع ما تقولش
تانى حاجه.. اعرف سعر الوظيفه ف السوق
ثالث حاجه.. انك تقول range مش رقم محدد ..
وممكن تقول انك حاليا بتاخد كذا وطبيعي انك مش هتقل عنه
